Општина Центар и годинава вложува во енергетско ефикасни фасади

Од утре започнува рокот за пријавување на сите заинтересирани заедници на сопственици на станови за реконструкција на фасадите на колективни станбени згради на територијата на општина Центар. Како и во минатите години, локалната самоуправа ќе вложи во изведба на енергетско ефикасни фасади на станбените згради постари од 25 години. Реконструктивниот зафат е предвидено да опфати изведба на нова термичка фасада и замена на дотраената фасадна столарија. Општина Центар ќе ги покрие трошоците во висина од 70% од вкупниот износ на енергетски ефикасната фасада, додека станарите ќе треба да ги покријат преостанатите средства.

„Новите фасади ќе го задржат автентичниот изглед на зградите и боите за кои последниот збор ќе го имаат жителите“ вели градоначалникот на општина Центар Саша Богдановиќ. Тој најави дека оние жители од станбените згради што се социјални случаи или лица со посебни потреби нема да плаќаат никакви средства при изведбата на енергетско ефикасните фасади. Рокот за пријавување на сите заинтересирани заедници на станари истекува на 30 април.