Заврши санацијата на мостот „Гемиџии“ во Велес

После невцели осум месеци од почетокот на реконструктивниот зафат, градежната фирма „Синтек“ деновиве ги комплетираше активностите за санација на мостот „Гемиџии“ во центарот на Велес. Реконструкцијата на горниот дел од мостот завршија во текот на август – проект кој ја вклучи коловозната плоча, пешачките патеки, ивичниците на коловозот, оградата и хоризонталната сигнализација. Градежните работи на долниот дел од мостот бараа повеќе време поради потребата за поставување на антикорозивна заштита, како и санација на појавените пукнатини во објектот со репартур малтер и со епоксидни смоли. Со овој зафат се постигна неопходната безбедност за одвивање на сообраќајот, што беше главната причина за реализација на овој проект.

Општина Велес планира во текот на 2015 година да постави и нова ограда на мостот, за која веќе постои план како ќе изгледа. За санацијата на овој важен инфраструктурен објект беа обезбедени 530 илјади евра. Освен што ја премостува реката Вардар, мостот е дел и од велешката автобуска станица, односно служи како покривна конструкција над пероните.