Стартува изнајмувањето на велосипеди

Под мотото „Скопје изнајми велосипед“, втора година по ред стартува проектот за изнајмување на велосипеди во Скопје. Како и минатата година, изнајмувањето на велосипед ќе чини 10 денари од час, се наведува во соопштението на Ј.П. „Градски паркинг“ . Јавното претпријатие апелира до граѓаните посовесно да се однесуваат кон изнајмените велосипеди.

Новата сезона на изнајмување велосипеди треба да донесе два нови велосипедски пунктови, едниот кај Транспортен центар, а другиот во населбата Ѓорче Петров. Покрај овие два, ќе продолжат со работа и пунктовите кај плоштад Македонија и кај паркинзите во Бисер и во Капиштец. Градот Скопје доби кинеска донација за купување на нови велосипеди, но како што стојат работите, втората сезона ќе започне со изнајмување на постоечките велосипеди, а новите ќе пристигнуваат во наредниот период.

Проектот „Скопје изнајми велосипед“ беше пуштен во употреба на 18 јули 2010 година во соработка помеѓу градот Скопје и невладините организации ЕкоСвест и ГЕФ ПМГ. Измината година проектот донесе финансиска загуба за претпријатието „Градски паркинг“, поради ниската свест и култура на однесување на корисниците на велосипедите.

Бојан Блажевски