Со 48,6 милиони денари ќе се реконструират осум училишни објекти низ земјава

Министерството за образование и наука ги потпиша договорите за санација на објектите на осум основни училишта во македонските општини. Од државниот буџет се издвоени над 48,6 милиони денари за претстојните градежни работи, коишто ќе се изведуваат од фирмите „Изградба – комерц“ од Скопје, „Алдинг – инженеринг“ од Скопје, „Дрво – пром“ од Зрновци и „Жикол“ од Струмица. Со потпишаните договори ќе се извршат работи за реновирање и реконструкција на училишните објекти, при што времетраењето на потпишаните договори е 12 месеци.

Со проектот е планирано да се санираат просториите на училиштата во следниве општини: ОУ „Браќа Миладиновци“ во Пробиштип, ОУ „Тошо Арсов“ од Штип, ОУ „Бајрам Шабани“ од Куманово, ОУ „Крсте П. Мисирков“ од Оризари, ОУ „Лазо Ангеловски“ од скопската населба Аеродром, ОУ „Васил Главинов“ од скопската населба Чаир, ОУ „Бајрам Шабани“ од Кондово и ОУ „Перпарими“ од Чегране.