Наскоро реконструкција на Центарот за култура во Кочани

Со буџетски средства на Министерството за култура ќе започне реконструкцијата на зградата на националната установа Центар за култура „Бели Мугри“ во Кочани. Според информациите објавени од Министерството за култура, градежните работи ќе се реализираат во два дела. Во првата фаза ќе се реконструира дрвенаријата и фасадата на Центарот, додека со втората фаза ќе биде опфатена внатрешноста на градбата. Со целосната санација на објектот ќе се задоволат пропишаните мерки за енергетска ефикасност.

Објектот на Центарот за култура „Бели Мугри“ во Кочани е лоциран во централното градско подрачје, на Кејот на Кочанска река. Неговата изградба започнала во 1957/1958 година, а бил ставен во функција на 29 ноември 1964 година.