Почнува проектот за унификација на излозите во Скопската чаршија

Министерот за економија Беким Незири и претседателот на здружението „Еснаф“ Бејтула Морина денеска потпишаа договор за реализација на проектот за уредување на излозите и натписите на дуќаните лоцирани во Старата скопска чаршија. Јавниот повик за аплицирање на дуќанџиите веќе е објавен, а за проектот се обезбедени средства во износ од 400.000 евра. Иницијативата на Министерството за економија има за цел да го врати автентичниот изглед и да ги зачува културните вредности што ги поседува Старата скопска чаршија. Со претстојниот зафат ќе се унифицираат излозите на 60-тина дуќани од чаршијата.

Министерот Незири денеска најави дека проектот ќе продолжи и следната година, со тоа што крајната цел е да се опфатат сите дуќани од чаршијата. За зафатот што следува е изработена неопходната техничка документација за конзервација, санација и адаптација. За секој дуќан е подготвен посебен проект во три фази, кој вклучува претходен изглед на дуќанот, фактичка состојба во моментов и планиран изглед по интервенцијата за уредување на излогот. Интервенцијата ќе се реализира со соработка меѓу дуќанџиите, Министерството за култура и Конзерваторскиот центар.

Со зафатот ќе се уредат излозите на дуќаните, тендата и натписот на секој дуќан, околното зеленило, а оставена е можноста и за поставување на традиционалните ќепенци. Со проектот е планирано да се спроведат и мерки за енергетска ефикасност.