Неизвесно е кога ќе се постави милионската ограда на мостот „Слобода“

Неизвесности се обвиваат околу новата ограда од ковано железо на скопскиот мост „Слобода“ кај хотелот Холидеј Ин. Веќе неколку рокови за нејзиното поставување се пробиени, а од Градот Скопје не даваат информации за тоа кога ќе започнат работите околу нејзината изведба. Во меѓувреме, на мостот е поставена привремена ограда. Најавената ограда со реализирани слики и мотиви од македонското културно наследство е во вредност од над 70 милиони денари, односно околу 1.150.000 евра. За изработка и монтажа на заштитната ограда и канделабрите на мостот „Слобода“ беше склучен договор со компанијата РЖ Институт од Скопје и со белградската леарница Јеремиќ.

Новата ограда од ковано железо е изработена според замислата на авторите на идејниот проект, Константин Јанев и Маријан Камиловски. Од Градот Скопје за „Билд“ денеска не одговорија колкава е вкупната сума што се одвои за санација на носечката конструкција, тротоарите и осветлување на мостот, заедно со поставувањето на планираната ограда. Градските власти го потпишаа договорот за милионската ограда во првата половина од 2012 година.

Текст, фото: Бојан Блажевски