Реконструкцијата на железничките станици почнува во април

Санацијата на железничките станици во земјава ќе стартува во април годинава и треба да се комплетира во рок од една година. Изведувачот на работите веќе е избран, додека надзорот над градежните активности ќе биде познат во март. Реконструирани железнички станици ќе добијат Велес, Прилеп, Битола, Гевгелија, Богомила, Чашка, Табановце, Демир Капија, Градско и Неготино – Вардар. Финансиските средства за најавениот проект ги обезбеди Европската комисија.

Секоја од обновените станици ќе добие нови кровови и подови, ќе се санираат фасадите и внатрешните ѕидови, ќе се изградат нови тоалети и ќе биде имплементирана термичка изолација. Целосното осветлување во објектите е предвидено да се промени и да се инсталираат системи за ладење и греење, системи за противпожарна заштита, патнички информативен систем, но во станиците ќе се овозможи и пристап за лицата со намалена подвижност.