ТЕМА: Аеродромите во Белград, Скопје и Атина со најголем раст на Балканот

Скопскиот аеродром „Александар Велики“ успеа да влезе меѓу трите најуспешни поголеми аеродроми на Балканскиот полуостров во годишниот пораст на бројот на патници. Фреквенцијата на патници од аеродромот во Скопје е зголемена за 22,7%, а пред него според овој параметар е единствено аеродромот „Никола Тесла“ во Белград. Како и минатите години, најмногу патници лани имал аеродромот „Кемал Ататурк“ во Истанбул, кој опслужил дури 56.954.790 патници.

* Извори на податоци: EX-YU Aviation News, национални статистички заводи, Википедија 

Статистичките податоци за скопскиот аеродром „Александар Велики“ покажуваат дека неговите услуги ги искористиле 1.208.359 патници. Според информациите на специјализираниот блог Ex-Yu Aviation News, главниот македонски аеродром е седми по големина на територијата на поранешна СФР Југославија, ако се земе во предвид вкупната бројка на превезени патници во 2014 година. Леталиштата во Белград, Загреб, Сплит, Дубровник, Приштина и Љубљана имаат повеќе патници од аеродромот во Скопје, додека по него следуваат оние во Тиват, Сараево и Подгорица.

Единствен пад во бројот на патници во текот на минатата година е забележан кај приштинскиот аеродром „Адем Јашари“. Со намалување на патничкиот воздухопловен превоз од 13,7%, ова леталиште е и единственото на Балканскиот полуостров што бележи негативни резултати во 2014 година. Сите поголеми аеродроми во Бугарија, Романија, Турција и Грција бележат позитивни придвижувања, а се чини дека најголем успех има кај атинскиот аеродром „Елефтерос Венизелос“. Меѓународното леталиште во грчката метропола опслужило 15.196.463 патници, што претставува пораст од дури 21,2% во однос на 2013 година.

Меѓу земјите од поранешна Југославија, најголем статистички пораст во 2014 година е констатиран кај белградскиот аеродром „Никола Тесла“. Вкупната сума на патници кои полетале и слетале во српската метропола изнесува 4.638.194 патници, односно за дури 30,9% повеќе во споредба со идентичниот период од претходната година. Наспроти него, најмалку превезени патници – 701.320 имал аеродромот во главниот град на Црна Гора.

Позитивните придвижувања на бројот на лица кои ги користат аеродромите во Македонија и во регионот се очекува да продолжат и во наредниот период. Во прилог на оваа теза оди и податокот дека нискобуџетната авиокомпанија „Визер“ од јуни 2015 година ќе започне со нови директни линии од скопскиот аеродром „Александар Велики“ до леталиштата во Барселона, Осло, Нирнберг, Хамбург и Фридрихсхафен. Заинтересираноста на граѓаните за евтини авио билети во текот на минатата година е главна причина за значителниот пораст на сумата на превезени патници во авиосообраќајот.

Бојан Блажевски