Тетово ќе добие претоварната станица за отпад

Долгодишниот проблем со натрупувањето на отпадот на влезот од Тетово конечно ќе се реши – Општина Тетово договорила изградба на центар за претовар на отпад во градот. Фирмата „Про-Инженеринг“ од Жеровјане ќе го гради затворениот објект, со кој ќе се надмине прашањето со транспортирање на отпадот во близина на железничката станица во Тетово. Вредноста на потпишаниот договор изнесува 29,7 милиони денари и истиот е планирано да се реализира во рок од 90 дена. Договорот е склучен пред еден месец и наскоро се очекува отпочнување на градежните работи.

Со реализацијата на проектот ќе се изведе објект кој ќе служи за претоварање на отпадот од тетовскиот регион. Во недостиг на соодветна локација за депонија, општина Тетово и понатаму ќе го пренесува тетовскиот отпад од центарот за претовар во скопската депонија „Дрисла“. Со претстојниот зафат ќе се реши прашањето со постојната локација за претовар на отпадот на отворено, која долги години наназад им предизвикува проблеми со натрупаниот смет на граѓаните кои живеат на влезот од Тетово.