Старт на изградбата на кружен тек кај „СП Планет“ во Ѓорче Петров

Кружен тек со две коловозни ленти широки по 3,5 метри ќе се оформи на вкрстувањето на улиците Ѓорче Петров, Радушка и Воин Драшковиќ, непосредно до трговско-деловниот центар „СП Планет“. За потребите на новото сообраќајно решение ќе се раскопа постојниот асфалт и ќе се дислоцираат сообраќајните знаци и осветлувањето. По должината на новоформираниот коловоз ќе се постават рабници, а површината ќе се тампонира и ќе се покрие со нов асфалтен слој со дебелина од 19 сантиметри. Во рамките на проектот ќе се уредат и прошират влезовите во трите улици и ќе се уредат нови пешачки и велосипедски патеки.

Почетокот на градежните работи го означија градоначалникот на Скопје, Коце Трајановски и градоначалникот на Општина Ѓорче Петров, Сокол Митровски. Изведувач на проектот е „Пелагонија Гостивар“, а вредноста на инвестицијата е нешто над 130 илјади евра, средства од буџетот на Град Скопје. Веќе подолго се најавува изградба на кружни текови и на поголем број други локации низ градот.