Со физибити студија ќе се решава кој ќе инвестира во катна гаража во Охрид

Општина Охрид се одлучи да распише оглас за изработка на физибилити студија што ќе ја утврди оправданоста за изградба на катна гаража во централното градско подрачје. „Целта на оваа студија е да се утврди дали општина Охрид ќе има повеќе придобивки доколку сама го реализира проектот или Општината влезе/воспостави јавно – приватно партнерство“ се наведува во објавениот оглас. Катната гаража би се градела зад градскиот пазар и би имала приземје и пет ката, со максимална површина на објектот од 6.785 метри квадратни.

Покрај тоа што ќе треба да го покаже начинот на финансирање на катната гаража, идната физибилити студија е предвидено да ги опфати и останатите предизвици, меѓу кои е фактот дека идниот објект ќе се наоѓа во заштитено подрачје што претставува дел од споменична целина. Изработката на физибилити студијата е предвидено да чини околу 150.000 денари, додека времетраењето на договорот потпишан со идниот консултант ќе биде 12 месеци. Заинтересираните консултантски куќи имаат рок до 1 ноември за да ги достават понудите за учество во тендерската постапка.