Распродадени парцелите во индустриската зона Сачево

Речиси 40 хектари во индустриската зона Сачево кај Струмица, преку јавно наддавање во Министерството за транспорт и врски, преминаа во приватни раце. Шеснаесет домашни и странски инвеститори ја искористија можноста за купување на земјиште со почетна цена од едно евро за метар квадратен и таму планираат да градат фабрика за сушење на овошје и зеленчук,  конзервно преработувачки капацитети, погони од дрвната, текстилната, металната и хемиската индустрија, како и погони за производство на градежни материјали. Директниот финансиски ефект за државата од продажбата на 396-те илјади метри квадратни градежно земјиште изнесува вкупно 460 илјади евра, а очекуваните инвестиции се проценуваат на 15 милиони евра. Првите погони треба да проработат до крајот на годинава. Во индустриската зона Сачево се очекува да се вработат околу 2.000 лица. Таа е една од шесте зони што се градат во Струмица. Четири од нив се инвестиција на Општината, а две се реализираат заедно со Дирекцијата за индустриски зони.