Пречистителна станица за заштита на Треска

Стартуваше изградбата на пречистителна станица за комуналните отпадни води од селата Глумово, Шишево и околината. Станицата ќе има капацитет за преработка на 1.445 метри кубни отпадна вода дневно и ќе може да опслужува околу 10 илјади жители. Финансиските средства за реализација на проектот во висина од 610 илјади евра се одвоени од буџетот на Министерството за животна средина и просторно планирање.

Министерството во наредниот период планира да изгради и пречистителни станици за отпадни води за населените места Матка и Лаки со што трајно ќе се реши проблемот со отпадните води во реонот, кои ја загадуваат реката Треска и подземните води. Системот за заштита на  водите на Треска се надврзува на системот во село Волково за заштита на водите на Лепенец. Со реализација на овие пречистителни станици директно и индиректно ќе се заштитуваат водите на Вардар, а за целосно заокружување на системот во скопскиот регион, треба да следува изградба на и пречистителни станици во Трубарево и Драчево.