Општина Центар го стартуваше проектот за гасификација

Со почетокот на зафатот за замена на парното греење со природен гас во О.У. „Димитар Миладинов“, локалната самоуправа од Центар денеска го започна проектот за гасификација на општината. Во оваа фаза ќе се изврши и приклучување на системот за пренос на природен гас преку поставување на мерно регулациона станица и врзување со главниот вод. „Од денеска започнува сериозен зафат со гасификација во општина Центар. „Димитар Миладинов“ досега плаќаше 80 илјади евра за парно греење, но со замената на природен гас, оваа сума ќе се намали на 30 илјади евра. Наша цел е гасификацијата да се прошири, со што ќе има повеќе потрошувачи на природен гас. На оваа станица ќе можат да се приклучат и околните станбени згради“ истакна градоначалникот на општина Центар Андреј Жерновски.

Во наредниот период во оваа општина ќе се гасифицираат училиштата „Гоце Делчев“ и „Кочо Рацин“, како и градинката „13 Ноември“. Замената на парното греење со природен гас се очекува да заврши во рок од три месеци. Општина Центар наскоро треба да формира и сопствено претпријатие за целосна реализација на проектот за гасификација на нејзина територија.