Оформен споменичниот духовен триаголник во Охрид

Вчера на градскиот плоштад во Охрид беше поставен споменик на Свети Наум Охридски, а денес, на празникот посветен на светителот, ќе се одржи свечена церемонија и негово формално откривање. Бронзената споменична скулптура заедно со постаментот е висока 6,5 метри и чинеше 165 илјади евра. Изработена е во српската леарница „Браќа Јеремиќ“. Автор е академикот Томе Серафимовски, кој исто така е автор на веќе постоечките споменици на Светите браќа Кирил и Методиј (1989) и на Свети Климент Охридски (2006), кои се во непосредна близина. Со ова се комплетираше дамнешната идеја за духовен триаголник на овие великани на сесловенската писменост и култура, во центарот на Охрид.