МОК трага по архитектонски труд за „олимписка куќа“ во Скопје

Македонскиот Олимписки Комитет (МОК) денеска го објави вториот по ред Конкурс за избор на идејно-архитектонско решение за изградба на „олимписка куќа“ во Скопје. Станува збор за проект кој вклучува изведба на административно-деловен објект, со музеј и одделен клуб-ресторан во склоп на идното здание. Архитектите и заинтересираните бироа треба да исполнат десетина критериуми кои претставуваат почетна точка при оценувањето на авторските творби од страна на оформената жири-комисија. Меѓу нив, МОК трага по решение кое ќе понуди креативност и инвентивност, но и ќе овозможи успешност во воспоставувањето на нов архитектонски контекст и дооформување на постоечкиот.

Распишаниот Конкурс е отворен за аплицирање до 21 октомври, како краен датум до кога авторите треба да ги достават своите трудови до Македонскиот Олимписки Комитет. Жири-комисијата на најуспешното архитектонско дело ќе му додели прва награда во износ од 100.000 денари, авторот на второнаградениот труд ќе се стекне со 60.000 денари, додека третата награда е предвидено да изнесува 30.000 денари. Новиот архитектонски Конкурс следува по првичниот неуспешен обид да се избере соодветно решение за планираната „олимписка куќа“.

Бојан Блажевски

bojan.blazevski@build.com.mk