Куманово размислува гасификацијата да ја препушти на приватниот сектор

Јавното претпријатие „Куманово – гас“ е пред продажба, а конечната одлука за ваквата постапка треба да ја изгласа Советот на општина Куманово. Локалната самоуправа од градот се одлучи на овој чекор поради нужното подмирување на долговите поради кои е блокирана општинската сметка веќе една година. Вредноста на ова претпријатие е проценета на 2,8 милиони евра, при што на идниот приватен партнер преку берзанска трансакција би му се продал управувачкиот пакет на акции. И покрај трансформацијата на „Куманово – гас“, тоа ќе треба да продолжи да ја развива неопходната гасоводна инфраструктура. Општината ќе го даде на продажба и комерцијално – деловниот простор во рамките на затворениот базен, а од собраните финансиски срества се надеваат дека ќе можат да ги реализираат ветените проекти.

„Ако можеше Топлификација од Скопје да се продаде, не гледам зошто не и ние, на еден транспарентен начин на берза да го направиме истото“, изјави градоначалникот на Куманово Зоран Дамјановски за локалниот интернет – портал „Куманово Њуз“. Општина Куманово веќе неколку години наназад инвестира во изградба на гасоводната инфраструктура во градот. Гасот во текот на оваа грејна сезона го користат стотина правни субјекти и физички лица, а се очекува нивниот број и понатаму да се зголемува. Во градот досега се изведени 16.260 километри гасоводна мрежа, со што е обезбедена можноста за натамошно приклучување на граѓаните и на компаниите.