Крива Паланка ја комплетира документацијата за гасификација на градот

Општина Крива Паланка ќе изработува инфраструктурен проект за изградба на дистрибутивна гасоводна мрежа со должина од 8.500 до 9.000 метри. Станува збор за последната фаза од изготвувањето на проектната документација за гасификација на градот, по што ќе следува и изведба на гасоводните траси на терен. За гасоводната мрежа во Крива Паланка во изминативе години беше изработен основен проект со сите фази, а беше усвоена и физибилити студија за реализација на овој значаен проект за градот.

Инфраструктурниот проект е предвидено да се изработи во рок од 90 дена. За неговата подготовка ќе се издвојат околу 350.000 денари од општинскиот буџет. Дистрибутивната гасоводна мрежа во Крива Паланка би почнала да се гради по комплетирањето на документацијата, но и по изборот на модел по кој ќе се финансира самиот зафат. Овој град од североистокот на Македонија е првиот што доби пристап до природен гас преку изградбата на магистралниот гасовод од Деве Баир до Скопје во 90 – те години од минатиот век, но општинските раководства до денешен ден не извршиле гасификација на оваа градска средина.