Кочани бара приватен инвеститор за изградба на СПА-центар

Општина Кочани денеска објави повик за воспоставување на јавно-приватно партнерство за изградба на СПА-центар во градот. Идниот приватен инвеститор ќе треба да го проектира, финансира, управува и одржува идното спорско здание што ќе се гради до градскиот базен во Кочани. Концесионерот ќе управува со СПА-центарот во период од 30 години. Вкупната проценета вредност на договорот изнесува 1.330.000 евра, без вклучен ДДВ. Инвестицијата во СПА-центарот покрива околу 880.000 евра од договорот, додека преостанатите средства би се вложиле во летната дискотека „Аква“.

Локалната самоуправа изработи физибилити студија за реализација на проектот. Овој документ покажа дека идниот концесионер би уплаќал најмалку 10.000 евра годишно на општина Кочани врз основа на реализацијата на оваа инвестиција. СПА-центарот би се изградил во рок од три години. Приватниот инвеститор ќе треба да склучи дополнителен договор со КЈП „Комуналец“ од Кочани за искористување на студената или на топлата геотермална вода за одржување во функција на спортско-рекреативниот комплекс.