Кичево конечно ќе ја добие болницата што ја чека со децении

Министерот за здравство Никола Тодоров изјави дека во текот на утрешниот ден ќе се распише тендерот за реконструкција и доградба на кичевската општа болница. Во проектот е предвидено да се инвестираат 200 милиони денари или околу 3,25 милиони евра. Ветениот здравствен објект ќе се простира на површина од 7.000 метри квадратни и ќе биде целосно опремен за да им овозможи адекватна заштита на 70.000 жители од Кичево и околината. Рокот за негова изведба изнесува 16 месеци, а градежните работи ќе започнат претстојната пролет. „Практично станува збор за изградба на нова болница која ќе вклучува пет одделенија за секундарна здравствена заштита, 10 специјалистичко консултативни служби и четири одделенија со дневна болница. На овој начин, во овој објект ќе бидат сместени сите одделенија за гинекологија, интерна, амбулантски дел, нов ургентен центар и делот за дијализа“, изјави министерот Тодоров.

Кичевската општа болница се гради повеќе од 25 години, но никако проектот да се заокружи во разумен рок. Нејзината изградба е започната, но не е завршена. Во неколку наврати во минатото се даваа ветувања дека истата ќе биде комплетирана, но и покрај изјавите, надлежното Министерство за здравство не пристапи кон остварување на предвидените градежни активности.