Ќе се работи на проект за регулирање на коритото на Лепенец

Центарот за развој на Скопскиот плански регион ќе ангажира проектантско биро за изработка на техничката документација за регулација и уредување на коритото на реката Лепенец. Проценките на оваа институција се дека проектантските услуги ќе чинат 1.645.763 денари, без вкалкулиран ДДВ. Лепенец се влива во реката Вардар кај скопската населба Злокуќани. Веќе неколку децении наназад коритото на оваа река е преполно со ѓубре, додека опасноста од поплави демне врз населението што живее во општините Карпош и Ѓорче Петров. Пред три месеци, Македонија и Косово се договорија заеднички да работат на заштита на реката Лепенец. Наскоро треба да се подготви заеднички план за управување со сливот на оваа река, за што е предвидено да се искористат финансиски средства од Програмата за прекугранична соработка помеѓу Република Македонија и Република Косово во рамките на Инструментот за претпристапна помош од ЕУ-ИПА.