Ќе се покрие сцената на Античкиот театар во Охрид

Н.У. Завод и музеј од Охрид распиша оглас за изведување на покривна конструкција на сцената на Античкиот театар во Охрид. Монтажното покривање на овој значаен културно – историски локалитет во стариот дел на градот ќе се реализира во насока на непречено одвивање на уметничките настани во текот на летниот период. Надлежната институција од Охрид веќе ја изготви проектната документација, со која се предвидува покривање единствено на сценскиот дел, но не и на целиот Антички театар. Зафатот е предвидено да започне на 1 декември годинава и да се заврши најдоцна до 1 мај 2014 година.

Во публикуваниот оглас се наведува дека заинтересираните компании треба да ги достават своите понуди најдоцна до 19 ноември, за кога е предвидено и нивното јавно отворање. „Охридско лето“, како една од најзначајните културни манифестации во Македонија, со години се мачи со проблеми при реализирањето на закажаните настани. Во услови на неповолни временски услови, организаторите се приморани да изнајдат алтернативен простор за однапред договорените концерти и театарски претстави.