Кавадарци со приватен партнер ќе го отвора олимпискиот базен

Општина Кавадарци распиша оглас за пронаоѓање на приватен партнер за најавената реконструкција и доградба на затворениот олимписки базен во градот. Концесионерот на спортското здание ќе треба да вложи сопствен капитал во проектот, а во замена ќе се стекне со правото за управување на базенот. Вредноста на идниот концесиски договор е проценета на 42,4 милиони денари, без вклучен ДДВ. Повикот за воспоставување јавно-приватно партнерство е отворен до 4 јули, по што ќе следи изборот на најповолен понудувач.

Локалната самоуправа при селекцијата на понудите ќе се задржи на три критериуми: времетраењето на договорот за јавно-приватно партнерство (60 бодови), рокот за реконструкција и изградба на објектот што ќе го зададе инвеститорот (30 бодови) и висината на концесискиот надоместок за општина Кавадарци (10 бодови). Постапката следува откако локалните власти пред четири години со судска одлука повторно го добија базенот во своја надлежност.