Битола ќе го добие новиот градски стадион во 2018 година

Општина Битола, во соработка со Фудбалската федерација на Македонија (ФФМ), во моментов го градат новиот стадион под „Тумбе Кафе“. Во изминатиов период беше завршена санацијата на фудбалскиот терен, кој заедно со рефлекторите и двете споредни трибини ќе бидат донирани од ФФМ. Локалните власти ја градат новата северна трибина, која ќе има капацитет за 4.000 гледачи. Во проектот е предвидено да се инвестираат над 6,2 милиони евра. Новиот градски стадион во Битола ќе се пушти во употреба во текот на 2018 година.

Во наредниот период ќе се гради трибинскиот простор на стадионот, вклучувајќи ја и целосната санација на постојната трибина. Проектната документација предвидува изградба на спортски објект што ќе може да прими 12.000 гледачи. Со изведбата на рефлекторите и подтрибинскиот простор за играчите, новиот стадион ќе ги исполни условите за одигрување на меѓународни фудбалски натпревари.