Со државни средства годинава ќе се градат 11 нови детски градинки

Вкупно 11 нови детски градинки ќе се градат годинава во различни делови од Македонија со поддршка од Министерството за труд и социјална политика. Министерката Мила Царовска денеска ги потпиша договорите со градоначалниците на општините кои партнерски ќе учествуваат во изведбата на објектите. Како што информираат од владината прес-служба, годинава ќе отпочне изградбата на две детски градинки во скопската општина Гази Баба, а вакви зданија е предвидено да се подигнат и во општините Ѓорче Петров, Куманово, Кавадарци, Брвеница, Босилово, Врапчиште, Шуто Оризари, Демир Капија и Штип.

Министерката Царовска ги повика општините да конкурираат со квалитетни проекти за изградба на нови градинки, затоа што постојат средства за оваа намена во државниот буџет, но и заем од 15 милиони евра од Светската банка. Таа напомена дека буџетот за изградба на ваков тип објекти за годинава е зголемен за 300%. Министерството за труд и социјална политика во изминативе една и пол година учествуваше во изградбата на вкупно 24 градинки, при што поголемиот дел од нив се веќе ставени во функција.