Годинава нема да се одржи Големата годишна награда на ААМ

Големата годишна награда на Асоцијацијата на архитекти на Македонија (ААМ) годинава нема да се одржи, бидејќи во предвидениот рок бил пријавен само еден објект. Како што пренесува „Порта 3“, ваквата одлука на ААМ доаѓа по исклучително малиот интерес за пријавување на архитектите чии дела биле реализани во изминатиов период. Од ААМ се надеваат дека во иднина ќе се збогати продукцијата на квалитетно изградени објекти на територијата на Република Македонија, по што и самите архитекти ќе одлучат да се пријават на јавниот повик за оваа награда.

Традиционалниот настан годинава требаше да се одржи по 24-ти пат од неговото основање. Поради малиот број на пријавени дела, Големата годишна награда на ААМ за прв пат воопшто нема да се одржи. Самата манифестација се организира под покровителство на Претседателот на Република Македонија, спонзорирана е од Македонската авторска агенција и е поддржана од Министерството за култура на Р.М. За последен пат оваа награда беше доделена лани на архитектот Александар Карангелов.