„Синтек“ ја заврши санацијата на оштетениот мост на пругата Велес – Гевгелија

По едномесечниот застој, железничкиот сообраќај на Коридорот 10 вечерва ќе биде повторно воспоставен. Македонски железници – Инфраструктура успеа да го санира оштетениот мост меѓу станиците Градско и Кукуричани, со што се создадени услови за воспоставување на товарниот и на патничкиот транспорт меѓу Велес и Гевгелија. Градежните работи на терен беа реализирани од скопската фирма „Синтек Инженеринг“, со која МЖ – Инфраструктура склучила договор на 4 октомври, во вредност од 22 милиони денари, за итна санација на оштетениот мост, вклучувајќи ја и изработката на техничката документација за зафатот.

Со реализираните санациони активности се очекува Македонски железници – Транспорт уште вечерва да ги пушти во сообраќај предвидените товарни и патнички возови, кои се во прекин од 2 октомври годинава и кои предизвикаа директни загуби во работењето на претпријатието од десетици милиони денари.