24 милиони денари за изградба на претоварна станица на струшката депонија

Општина Струга ќе издвои 24 милиони денари за да го реши проблемот со натрупаниот отпад на струшката депонија. Во период од 12 месеци, трите скопски фирми „Карпош АД“, „Техникс“ и „Уни Стил Ком“ се должни да ја изградат претоварната станица за комунален отпад, која што ќе има капацитет да обработи 45 тони на час. „Карпош АД“ ќе биде должен да го изгради овој инфраструктурен објект, додека „Техникс“ ќе ја достави опремата и инсталацијата за претоварната станица. Транспортот на компресираниот комунален отпад до скопската депонија „Дрисла“ ќе го врши „Уни Стил Ком“.

Со реализацијата на овој проект се очекува во целост да се реши проблемот со сегашната депонија во Струга. Со неговата реализација ќе се дислоцира комуналниот отпад во адекватна депонија, со што ќе се отстрани опасноста од потпалување на отпадот и натамошното аерозагадување на Струга во текот на летните месеци. Тендерската постапка за овој проект беше распишана на почетокот од април годинава.