Со нови водомери од 1,9 милиони евра ќе се штети вода во Куманово

По неколкугодишен застој, Министерството за транспорт и врски ја започна реализацијата на проектот за замена и инсталација на нови водомери и нивна интеграција во системот за далечинско отчитување како составен дел од водоснабдителниот систем на Куманово. Во овој проект ќе се вложат над 116 милиони денари (околу 1,9 милиони евра), а за нејзин изведувач е избрана фирмата „Техноскоп“ од Скопје. Инсталацијата на новите водомери во Куманово треба да се реализира во период од една година.

Станува збор за инсталација на 10.000 електрични водомери и нивна интеграција во систем за далечинско отчитување. Претстојната набавка ќе вклучи и инструменти за откривање на подземни дефекти и обуки за вработените за управување со усовршениот систем. Ваквиот проект би довел до намалување на губитоците на вода и зголемување на ефикасноста во работењето на кумановското јавно претпријатие „Водовод“. Финансиските средства за овој проект се обезбедени од Европската Унија преку ИПА фондовите.