Три парцели за големи трговски центри се продаваат во Струга

Општина Струга објави оглас за продажба на три градежни парцели за изградба на големи трговски единици во градот. Станува збор за државно неизградено земјиште со површина од 2.511, 2.494 и 2.006 метри квадратни. Огласените локации ќе се продаваат по почетна цена од 2.000 денари по метар квадратен. Заинтересираните инвеститори треба да достават банкарска гаранција во висина од 100% од вкупната почетна цена, која заедно со пополнетата пријава ќе треба да ја достават најдоцна до 23 април. Јавното електронско наддавање за огласените парцели ќе се одржи на 25 април.

По одржувањето на електронската лицитација, општинските власти ќе склучат договори за купопродажба со најповолните понудувачи. Идните инвеститори ќе треба да обезбедат одобренија за градење на планираните објекти во рок од девет месеци по солемнизацијата на договорите. Идните објекти од комерцијален карактер би имале предвидена висина од приземје и два ката. Новите трговски единици во Струга би се простирале на површина од 1.622 до 2.603 метри квадратни.