Во Тетово годинава ќе се доградат две од трите клучни сообраќајници

Општина Тетово годинава планира да ја започне доградбата на две од трите најважни сообраќајници во градот. Локалните власти со финансиски средства од европските ИПА фондови сака да ги пробие булеварите Илинденска и Индустриска, со што во значителна мерка би се намалил сообраќајниот метеж во Тетово. За двата капитални проекти ќе бидат потребни околу 130 милиони денари. Ако Министерството за финансии ги одобри средствата за овие проекти, тогаш градежните работи за пробивање на двата булевара би почнале уште во март годинава.

Целокупната проектна документација за доградба на овие булевари веќе е изготвена. Булеварот Индустриска би се доградил за дополнителни 1,5 километри, додека булеварот Илинденска би се пробил во должина од 700 метри. Од Општината очекуваат дека со реализацијата на овие два проекти ќе се намали бројот на автомобили во централното градско подрачје. Со булеварите ќе се обезбеди транзитна сообраќајна врска за возилата што сообраќаат кон Косово, но и дополнителната врска со автопатот Тетово – Гостивар.