Македонските автопати наскоро ќе добијат брани за заштита од бучава

Неколку години по нивната задолжителна изведба на автопатите во Европската унија, во нашата земја конечно се презеде мерка за изведба на звучни брани на главните патни правци на Коридорите 8 и 10. Јавното претпријатие за државни патишта денеска го објави тендерот за изработка на проектна документација за заштита од бучава на автопатските делници во земјава. Идниот проектант ќе има рок од четири месеци по потпишувањето на договорот за да ја изготви неопходната документација. Проценетата вредност на тендерот изнесува околу 2,4 милиони денари. Заинтересираните субјекти имаат рок до 27 ноември за да ги достават своите понуди до јавното претпријатие.

Големата бучава од патиштата е горлив проблем што долги години наназад не е решен во Македонија. Модерни звучни бариери во моментов се поставени единствено на Скопската обиколница, но не и на другите автопати. Истражувањата од европските земји покажуваат дека возилата на патиштата создаваат просечна бучава од 80 децибели, што може да влијае штетно по здравјето на граѓаните кои живеат непосредно до патиштата. Како последица на ова, на сите пофреквентни патишта во европските земји во последните неколку години се поставуваат звучни брани крај патот.

Бојан Блажевски

bojan.blazevski@build.com.mk