„Актор“ вели дека нема криминал при изградбата на автопатот Демир Капија – Смоквица

Грчката градежна компанија „Актор“ се брани од кривичното гонење на Грчкото обвинителство со алиби од македонските судови. Оваа фирма во денешното соопштение наведува дека судските власти во Скопје по извршената ревизија во работењето утврдиле дека нема немало никаков прекршок и дека предметот од 2014 година е ставен во архива. Од „Актор“ негираат дека се переле пари при изградбата на автопатската делница и посочуваат дека немало никаква измама при одвивањето на градежните работи.

Од компанијата соопштуваат дека тие доставиле најниска цена во висина од над 210 милиони евра на меѓународниот тендер, на кој како претставник учествувал набљудувач на Европската Комисија и претставници на Европската банка за обнова и развој и Европската инвестициона банка. Соопштението на „Актор“ следува по вчерашната информација дека Грчкото обвинителство ќе ја гони оваа фирма за перење на пари во висина од 50 милиони евра. Поведувањето на постапка во Грција може да доведе до судски процес, во кој „Актор“ би можел да биде казнет за тешкиот обвинителен акт.

Скандалот со перење пари први го открија македонските социјалдемократи во 2014 година. Од СДСМ преку соопштение за јавноста посочуваат на скандалозното непостапување на Јавното обвинителство од земјава во овој случај. „Скоро 3 години не постои никаква правна разрешница на овој случај во Македонија токму заради блокираните институции и непостапувањето на Марко Зврлевски“ посочуваат од СДСМ. Автопатот Демир Капија – Смоквица со должина од 28,2 километри е веќе изграден и наскоро се очекува неговото пуштање во употреба.

» Форумска дискусија за овој проект