Втора фаза од изградбата на инфраструктурата во ТИРЗ Струмица

Дирекцијата за технолошки индустриски развојни зони распиша постапка за избор на изведувач за втората фаза од изградбата на потребната инфраструктура и пристапниот пат до Технолошко-индустриски развојната зона во Струмица, со вредност од околу 72 милиони денари. Индустриската зона треба да биде поврзана со регионалниот пат Куклиш – Банско – Ново Коњарево. Планирано е да се изведат по две влезни и излезни ленти од зоната со широчина од по 3,75 метри и да се догради неопходната инфраструктура во рамките на самата зона.

Изградбата на ТИРЗ Струмица започна со реализација во септември 2013 година, кога беше најавено дека за целокупната инфраструктура во рамките на зоната ќе се вложат 4,9 милиони евра од државниот буџет. Индустриската зона е планирано да се протега на површина од 25 хектари. Во ТИРЗ Струмица во изминатиов период сопствен погон на површина од 13.000 метри квадратни гради американската компанија „Џонсон Контролс“.