Во април ќе започне санацијата на автопатот Куманово-Скопје

Од наредниот месец ќе започне санацијата на автопатската делница што ги поврзува Скопје и Куманово. Министерот за транспорт и врски Владо Мисајловски најави дека најпрво ќе се рехабилитира трасата во правец од Куманово кон Скопје. „Се работи за голема инвестиција во соработка со ИПА – фондовите. Целиот проект чини над 10 милиони евра. Првата фаза почнува во април, а следната за неколку месеци, што значи дека за околу 12 до 15 месеци ќе имаме нов автопат Скопје – Куманово“, посочи министерот Мисајловски. Санацијата на коловозот ќе се одвива на потегот од Куманово до селото Миладиновци и ќе опфати вкупна должина од 23 километри.

* Aавтопатот Куманово - Скопје

Реконструкцијата на автопатот меѓу Скопје и Куманово е еден од проектите што се одложуваше од една во друга година во изминатиов период. Јавното претпријатие за државни патишта го започна процесот за подготовка на проектната документација пред три години. Коловозот во двата правци на оваа делница од Коридорот 10 е во многу лоша ситуација, со брановиден асфалт опасен за одвивање на сообраќајот и со многу дупки. Покрај рехабилитацијата на коловозот, во моментов се одвиваат активности за изведба на нови наплатни станици на оваа автопатска делница кај кумановското село Романовце.

Бојан Блажевски

bojan.blazevski@build.com.mk