Гостивар доби филтер станица за вода

Граѓаните на Гостивар ќе пијат филтрирана и здрава вода. Заврши изградбата на филтер-станицата на гостиварскиот водовод, со што се реши долгогодишниот проблем за користење на квалитетна вода за пиење во градот и околните населени места. „Проектот чинеше 2.000.000 евра и се инвестираше од страна на Министерството за животна средина и просторно планирање. Гостивар го купи земјиштето каде што се изгради пречистителната станица, како и учествуваше во изградбата на трафо-станицата од каде што објектот се снабдува со електрична енергија. Јавното комунално претпријатие ги поврза водоводните цевки со филтер-станицата“, вели гостиварскиот градоначалник Невзат Бејта. Реализацијата на проектот доцни речиси три години.

* Извор на фотографија: Општина Гостивар

Дополнителни финансисии во висина од 100.000 евра вложија Општина Гостивар и јавното комунално претпријатие. Во претстојниот период е предвидено проширување на водоводната мрежа кон селата Чегране и Форино. Во Гостивар се спроведува и проект за замена на азбестните со ПВЦ цевки, кој треба да се заокружи во текот на 2016 година. Овој проект претставува соработка меѓу централната власт, Општина Гостивар, Швајцарската агенција СЕЦО и Германската КфВ банка.