Се подготвува реконтрукција на главната улица во Сарај

Градот Скопје денеска го распиша тендерот за избор на градежна компанија што ќе ја реализира првата фаза од реконструкцијата на главната улица во населеното место Сарај. Станува збор за целосна санација на сообраќајницата во должина од 665 метри, за која е планирано од градскиот буџет да се одвојат 5.623.632 денари, без вклучен ДДВ. На овој потег ќе се постави нов коловоз, а предвидено е да се обноват и девастираните патеки наменети за пешаци и велосипедисти. Проектот во натамошните фази ја опфаќа реконструкцијата на оваа улица на потегот од црквата Св. Злата Мегленска до раскрсницата со магистралниот пат за локалитетот Матка и патот за Тетово.

* Извор на фотографија: Град Скопје

Тендерот за реализација на првата фаза од реконструкцијата на главната улица во Сарај е отворен до 18 јануари 2016 година. По изборот на најповолен понудувач, градските власти ќе пристапат кон остварување на градежните работи, за што се обезбедени средства од Буџетот на Град Скопје за 2016 година. Главната сообраќајница во ова населено место ќе се поврзе на новоизградениот мост што ги поврзува општините Ѓорче Петров и Сарај. Во рамките на проектот, тогаш беа изведени пристапните улици од неколку стотина метри од мостот кон црквата Св. Злата Мегленска.

Бојан Блажевски

bojan.blazevski@build.com.mk