Државата ќе изработува и урбанистички планови за градовите

Уште една надлежност на македонските локални самоуправи од наредната година ќе се префрли во надлежност на државата. Министерството за транспорт и врски денеска распиша јавен повик за доставување на предлози за изработка на урбанистички планови, регулациски планови на генерални урбанистички планови, урбанистичко – плански документации и урбанистичко – проектни документации во македонските општини. Сите предлози ќе треба да се достават до надлежното министерство најдоцна до 18 јануари 2016 година. За периодот од 2016 година, целокупната урбанистичко – планска документација ќе се изготвува од Агенцијата за планирање на просторот.

Изработката на урбанистички планови, регулациски планови на генерални урбанистички планови, урбанистичко – плански документации и урбанистичко – проектни документации е планирано да се финансира од Буџетот на Република Македонија. Од Министерството за транспорт и врски наведуваат дека оваа документација по исклучок ќе може да се финансира и од локалните буџети, од буџетот на Град Скопје и од заинтересирани физички и правни лица.

Основната функција на Агенцијата за планирање на просторот е изработка и учество во изработката на повеќе стратешки документи, особено на оние кои се во програмата на Владата на Република Македонија. Работењето на овој субјект претставува континуитет во работењето на Јавното претпријатие за просторни и урбанистички планови, кое датира од 1996 година.

Бојан Блажевски

bojan.blazevski@build.com.mk