Почна изградбата на пешачки натпатник меѓу Хиподром и Инџиково

Скопскиот градоначалник Коце Трајановски денеска го означи почетокот на градежните работи за изведба на пешачки натпатник преку автопатот Скопје – Петровец, што ќе ги поврзе населбите Хиподром и Инџиково во општина Гази Баба. „Градот Скопје на оваа локација сега ќе изгради челичен натпатник со бетонски столбови, челични скали и челични рампи, кој ќе овозможи безбеден премин на пешаци, пешаци со велосипеди и лица со посебни потреби“, изјави градоначалникот Трајановски.

Натпатникот ќе биде долг 63 метри, широк 5,4 метри, додека површината за движење ќе биде широка 3,1 метри. По неговата должина ќе биде поставена ограда висока 2 метра, изработена од челични профили и челична мрежа, како и конзоли за инсталации. На двете страни од оградата ќе се постават две електронски информативни табли и натпатникот ќе биде осветлен со 12 канделабри. За реализацијата на овој проект се предвидени финансии во висина од 38 милиони денари. Изготвувач на техничката документација е „Давос инвест“, а изведувач на градежните работи е фирмата „Бауер БГ“, која треба истите да ги комплетира во рок од 9 месеци.