Јавноста ќе го избира изгледот на плажите на Охридското езеро

Најавените пет плажи долж крајбрежјето на Охридското езеро ќе бидат избрани по пат на електронска јавна анкета од страна на граѓаните. Министерството за транспорт и врски денеска соопшти дека гласањето ќе се врши преку нивната веб – страница, каде што може да се изврши увид во доставените идејни решенија. Станува збор за плажите кај Далјан, Извиднички камп, Лагадин, Љубаништа и Студенчишко блато. На јавната интернет – анкета може да гласа секој граѓанин. Победничките решенија за уредување на плажите ќе добијат награди во висина од по 200.000 денари,а на второрангираните и треторангираните ќе им следуваат по 100.000 и 50.000 денари.

Најавените плажи во најголем дел ќе се изградат до 2017 година. За секоја од нив, предвидено е да се постави нов песок, хортикултурно да се уредат, да се изведе урбана опрема и фонтани за вода, шанк, санитарни јазли, тушеви, детски игралишта, пешачки патеки, но и да се обележи просторот за капење во езерото. Од надлежното министерство се надеваат дека новите плажи ќе ја збогатат туристичката понуда на Охрид и на околните населени места.