Избрано идејното решение за уредување на плажа на Охридското езеро

Македонските граѓани преку интернет – анкета го избраа победничкиот архитектонски труд за уредување на најавената нова плажа на Охридското езеро во непосредна близина на аеродромот „Св. Апостол Павле“ во Охрид. Министерството за транспорт и врски денеска соопшти дека за победник е прогласено идејното решение бр. 3, кое добило 56% од вкупно 3.072 гласови што ги дале граѓаните на спроведената анкета. Во наредниот период ќе се донесе решение за доделување на наградата од распишаниот конкурс, како и за исплата на трошоци за останатите архитектонски трудови.

Со проектот е предвидено да се уредат 500 метри плажа долж Охридското езеро, која би се изнивелирала и попесочила со соодветен автохтон песок, да се дооформи постојното зеленило со автохтони видови и хортикултурно и партерно да се уреди просторот со поставување на клупи, фонтани за питка вода, пешачки патеки од монтажно – демонтажни материјали. Идната плажа треба да има шанк со кабина за музика, место за озвучување, санитарен јазол, тушеви, соблекувални, прирачна остава за чадори, лежалки и други реквизити. Просторот за капење во езерото ќе биде обележан, а во рамки на уредениот простор се планирани места за информативни паноа, безжичен интернет и други погодности за забава и престој.

Од надлежното министерство посочуваат дека целта на овој проект е да се овозможи користење на водената површина од езерото, како и да се ползува просторот за рекреација во текот на целата година. Плажата е предвидено да се изгради во согласност со највисоките туристички стандарди, при што особено внимание ќе се посвети на зачувување на еко – интегритетот на околината.