Поставен камен темелник на спортска сала за УКИМ

Денеска беше означен почетоткот на изградбата на нова спортска сала за потребите на Универзитетот „Св. Кирил и Методиј“ во Скопје. Спортскиот објект ќе никне кај комплексот на Економскиот, Правниот, Филозофскиот и Филолошкиот факултет [»мапа] и трибините ќе имаат капацитет за 1.100 гледачи, додека подтрибинскиот простор ќе биде искористен за теретана и фитнес. Салата ќе може да се користи за кошарка, ракомет, одбојка, мал фудбал, пинг-понг, гимнастика, боречки спортови и сите останати дисциплини поврзани со физичкото образование и спортот на студентите, а исто така предвидено е да се користи и за активнсоти од културен карактер.

Во изградбата ќе се вложат 154 милиони денари или околу 2,5 милиони евра, средства обезбедени од Буџетот на Република Македонија, како дел од проектот за изградба на 35 спортски сали преку Агенцијата за млади и спорт. Рокот за пуштање во употреба на новиот објект е две години. Во рамки на Универзитетот „Св. Кирил и Методиј“, со средства од Владата изградена е и спортската сала на Факултетот за физичка култура, каде е предвидена изградба на уште една.