Музеј на ретки минерали ќе се гради во Пробиштип

Локалната самоуправа од Пробиштип денеска распиша оглас за избор на градежна компанија што ќе го реализира изложбениот павилјон во кој ќе бидат изложени ретки минерали ископани на рудните наоѓалишта во Македонија. Објектот ќе биде лоциран во центарот на Пробиштип и ќе се простира на површина од 150 метри квадратни. Планирано е во првиот музеј од ваков вид во земјава да се изложи богата минеролошка збирка од стотина експонати. Изградбата на музејската установа треба да заврши до август 2013 година, а во целиот проект е предвидено да се вложат околу 130.000 евра.

Музејот на ретки минерали се реализира со финансиска поддршка од општина Пробиштип и компанијата „Индо минерали и метали“. Малата музејска зграда ќе биде во форма на кристал. Локалната власт очекува дека новата установа ќе придонесе за поттикнување на туристите во градот, кој е познат како прва рударска населба на Балканскиот полустров.