Проширена уште една делница на Теодосиј Гологанов

Денеска беше официјално пуштена во употреба проширената и реконструирана делница на булеварот Митрополит Теодосиј Гологанов во Скопје, на сегментот од крстосницата со улицата Франклин Рузвелт до крстосницата со улицата Братфордска и булеварот 8-ми Септември, во должина од околу 750 метри. Новиот коловоз има четири коловозни ленти без средишно зеленило, а вкупната ширина е 16 метри. Од двете страни на сообраќајницата се формирани тротоари со широчина од по 3,5 метри, поплочени со бехатон плочки на вкупна површина од 6.500 метри квадратни. Во рамки на проектот беше изградена и атмосферска канализација во должина од 1.500 метри, со профил од 200 и 400 милиметри која е приклучена во постојниот колектор.

За овој инфраструктурен зафат, од градскиот буџет беа издвоени 47 милиони денари или околу 765 илјади евра. Градежните работи започнаа во јуни годинава, а проектот го реализираше градежната фирма „Транс Мет ДОО“.

» Форумска дискусија за овој проект