Градската болница ќе добие нов објект на местото на Мајчин дом во Аеродром

Министерот за здравство Венко Филипче денеска најави дека ќе се гради нова Градска болница во Скопје на местото на Мајчин дом во општина Аеродром. За оваа намена ќе се подигне кредит од Европската централна банка, којшто ќе биде доволен за реализација на целиот објект. Во него би се префрлила постојната Градска болница лоцирана спроти македонскиот парламент, која што во моментов работи во премал простор со површина од 5.000 метри квадратни. Со планираниот зафат ќе се руши постојната здравствена установа „Мајчин дом“ и на нејзино место би се изградил новиот здравствен објект.

Новата Градската болница во Скопје ќе се простира на бруто развиена површина од 18.640 метри квадратни. Објектот ќе има приземје и четири ката, со максимална висина од 18 метри. Маркичката за оваа градежна парцела со површина од 7.668 метри квадратни е вметната во ДУП за Градска четврт И 10, којшто беше усвоен од општина Аеродром во 2017 година.

»Форумска дискусија за овој проект