Битолски Драгор со редизајнирани мостови

Општина Битола денеска ги промовираше подготвителните активности на терен за отпочнување со реализација на проектот за редизајнирање на мостот на реката Драгор под Безистенот во центарот на градот. Вкупната инвестиција во проектот изнесува 2,6 милиони денари. Покрај новата конструкција на оградата, мостот ќе добие илуминација од двете страни, а ќе се постават клупи за седење и жардиниери. По завршувањето на зафатот, продолжува партерното уредување на потегот од мостот, покрај Борово и ТТК банка до стоковната куќа „Марди“.

_{извор на фотографија: Општина Битола} 

Во рамки на проектот „Реконструкција и редизајнирање на мостовите“, во изминатиот период извршена е санација и уредување на мостот кај гимназијата Јосип Броз Тито, музичкото училиште и дрвеното мовче, изграден е нов мост – кружен тек кај Црн мост, редизајниран е стариот мост на истото место и направен е пешачки мост, а мостот кај Безистенот е шеттиот мост по ред врз кој се вршат градежни активности. За реконструкција се предвидени и мостовите кај Карпош и Јенимаале.