Привршува изградбата на објектот „Сан Марко“

За неколку месеци Скопје ќе добие нови 5.400 метри квадратни современ деловен простор, на атрактивна локација во центарот на градот, во непосредна близина на плоштадот „Македонија“. При крај е изградбата на административно-деловниот објект „Сан Марко“, инвестиција на истоимената фирма во вредност од околу девет милиони евра. Привршува поставувањето на фасадата, а во моментов интензивно се работи во внатрешноста.

„Сан Марко“ е висок 29 метри и има осум надземни нивоа и поткровје, како и две подземни нивоа. Подземниот паркинг простор е со капацитет за 24 возила. Секој надземен кат има океанска канцеларија со големина од 400 метри квадратни и широк панорамски поглед. На поткровјето кое има форма на пресечена купола е предвидена конференциска сала. Зградата е оптимизирана да биде максимално функционална без разлика дали просторот ќе биде купен или закупен, целосно или од повеќе различни субјекти.

Фасадата на елиптичниот дел на објектот е изведена со заоблени стакла со Ug вредност од 1,1 W/m²K и брисолеи од „печено“ стакло. Другиот дел на објектот е покриен со издржлива вентилирана фасада од керамички плочки. Плочките се рапави, а експонираниот дел на релјефот е лакиран, со што ќе се добие несекојдневен визуелен ефект. На овој дел се поставени и огледални стакла кои покрај разиграност на фасадата обезбедуваат и продор на светлина.

„Сан Марко“ почна да се гради во април 2008. Проектот е изработен во Магос Дизајн (сега ГМС), а автор е Ѓорѓи Мојсов, со Оливија Мојсова како консултант и со Виолета Бошковска и Ленче Тошевска како соработници. Главен изведувач е градежното претпријатие „Илинден“, специфичните челични профили за поткровјето ги изработи „Актива“ од Штип, додека за фасадата и ентериерот задолжен е „Торакс“ од Скопје. Надзорот е доверен на „Реминг Инженеринг“.

Форумска дискусија за овој проект –> овде