Проблеми со дождот

Објавено на 26.10.2010 во категорија Блог.

Дека работите при изведба на еден објект не одат секогаш глатко и без проблеми доказ е следниов пост. Имено, при секој поголем дожд почна да се јавува вода во подрумот. Најпрво мислевме дека дождот влегува преку прозорците (кои во одреден период не беа монтирани), но по целосно затворање на објектот сфативме дека имаме друг проблем. Водата навлегуваше низ подрумот. Иако подрумската плоча и ѕидовите се изолирани со хидроизолација на битуменска основа, сепак некаде водата си го наоѓаше патот да се појави онаму каде што не ја сакавме.

Утврдивме дека слабост е спојот (врската) меѓу плочата и ѕидовите. Тие се бетонирани во различни фази, но веројатно поради густата арматура при бетонирањето на ѕидовите пер-вибраторот не ја завршил добро својата функција. Најверојатно на одредени места бетонот не е добро извибриран (хомогенизиран), па иако со око не се видливи постојат мали слободни отвори низ кои се слева дождовницата. Уште повеќе, бидејќи сеуше немаме олуци кои би ја зафатиле дождовницата од кровот и одвеле на одредено место, како и фактот дека нема заштитни тротоари околу објектот, на местата каде има прекршување на кровот се појавува оваа дождовница во подрумот.

Но, најдовме решение. Сега за сега функционира. Се работи за премачкување од внатрешна страна на подрумот со смеса за заптивање на активни продори на вода, „Убрзувач-Ч“, производ на „Адинг“ од Скопје. По неа, нанесовме хидроизолација во форма на премаз на цементна основа „Хидромал“, исто така од „Адинг“. Потрошивме околу 30 kg „Убрзувач-Ч“ чија цена е 93 ден/kg и околу 20 kg „Хидромал“ со цена од околу 40 ден./kg.

Доколку ова не успее да ја задржи водата, ќе мора да засукаме ракави и да ископаме повторно околу објектот за да може да го лоцираме проблемот и соодветно решиме. Ова е најдобро решение, но во овој момент најскапо и бара соодветни временски услови.

Проблем-вода во подрумот