Инсталации за греење и колектори

Во периодот меѓу 6 и 20 април 2011 работевме на поставување инсталации за греење и затоплување на санитарна вода со сончева енергија (колекторски систем). Во оваа фаза се поставуваа цевки за спроведување на топла и студена вода од разделните орманчиња до радијаторите и од орманчињата до “машинската соба”. Таа ќе се наоѓа во подрумот и ќе ги содржи сите елементи потребни за функционирање на системот за греење. Засега одлучивме котелот за загревање да биде на електрична енергија, но оставивме можност во системот да може да се приклучи и котел на друг вид енергија. Во оваа фаза (пред поставување кошулка на подовите) се поставуваа основните елементи: орманчиња, ПВЦ цевки, заштита, разделници, инсталација за приклучување камин во системот за греење и сл.

За затоплување на вода која ќе се користи во купатилата и кујната поставивме инсталации за колекторски систем како и самите колекторски панели. Инсталацијата се состои од бакарни цевки и сигнален кабел спроведени од подрумот до кровот. Соларните панели се поставени во рамнина со кровната површина. Се одлучивме за систем што ќе овозможи затоплување на 200 литри вода. Еве како изгледаше монтажата на елементите низ фотографии.